حايرة

حايرة بيني او بيني

حايرة بين مبغيت و مابغاو لية

بين ماختاريت و بين ما ختارو ليا

حايرة أنا بين الدين و الالحاد

بين الاحسان و الحقد

بين العز و الذل

حايرة بين الكاس و الكاس

بين الكاس و الفاس

بين الفاس و الناس

بين الناس و الباس

حايرة بين البيس اند لوف و بين  fuck the police and the system

حايرة بين هوية مدفونة و هوية محقونة

بين ثقافة مدمومة و ثقافة مهمومة، دمدومة

و صراحة مابقاش عجبني الحال

مابقاش عجبني الحال و عيت منحط عليهم اللومة

انا، انا لتعطلت ماشي التران مشا علية

انا، أنا لمبغيتش نقرا، ماشي بسباب المنظومة التعليمية

أنا، انا لمبغيتش نخدم، ماشي حيت فرص الشغل قليلة

انا، انا لمبغيتش نعيش، ماشي بسباب غلاء المعيشة

أنا، انا لمبغيتش نفهم، ماشي حيت الافلام التركية و الهندية عمرات التلف

انا، انا لمبغيتش نهضر، ماشي  حيت حرية التعبيير  shuuuuut

انا، انا لمبغيتش نفهم، ماشي حيث حرية الصحافة مقموعة

انا، انا لمبغيتش نستقل، ماشي حيت باقا كاينة التبعية

حايرة انا

حايرة بين انا و انا

بين انا و نتوما

واش بسبابي انا، نتونا ولا هما.